كان يا ما كان في قديم الزمان
وسالف العصر والاوان لحتى كان ، كان في بنت اسمها ليلى كانت ليلى عايشة مع امها
وابوها بالرابية ،وجدتها ساكنه بعبدون ، المهم ... ليلى كانت تحب جدتها بس امها
لليلى بتكره حماتها وما بدها اياها تعيش معهم بالبيت عشان بتكره الصوت العالي
وام ليلى بتحب تضل حاطة على روتانا كليب وتعلي عالاخر بينما جدة ليلى بتحب تحط
على ام بي سي فور عشان تتابع فريندز
المهم... ام ليلى مرة عملت دونتس
وحطته وصاروا ياكلوا ابو ليلى وام ليلى والسيريلانكية لويس ، اجت ليلى اكلت اول
حبة بعدين صارت تدور براسها انو ليش احنا بناكل دونتس وتاتا ابصر بتاكل دونتس
هلا ولاا عاملة دايت .
ليلى: ماما حطيلي اكمن حبة دونتس بـ توببر وير بدي اروح اودي لتاتا تاكل منه
ام ليلى ريتا: ماما ليلى بليز تشت اب تاتا لميس ما بتحب الدونتس ولا كان
بعتتلها مع الشوفير
ليلى: ماما بليز ما تكشري بوشي مرة تانية انا قلت بدي حبيتين دونتس اوديهم
لتاتا لميس اوديهم للعفاريت الزرق اتس نوت يور بروبليم
ريتا: اوكي اوكي ، لويييييييييس قومي حطي حبتين بالعدد بكيس من اللي ما بدك
اياهم ولفيهم للولو
لويس: اوكي مدام
لولو راحت لبست برمودا وبلوزة حفر عشان بتحب تتستر ادام تيتتها لميس لانها كتير
بتعلق على لبس هالايام المهم ...
ريتا: اسمعي ازا بدك تروحي عند تاتا لميس احكي مع الشب اللي هديك المرة عزمتيه
عالبيت نسيت اسمه ... اه تزكرت اللي اسمو نشات عشان بعتت الشوفير عالسيف ويه
يجيب بكيت دخان
لولو: ماما مش اول مرة بروح عبدون لحالي
المهم... البنت سحبت حالها ووقفت
عالشارع تستنى تكسي، ما مر ولا شوفير حلو بالاخير ، قامت اضطرت هالمسخمطة تركب
بسيارة قرش ونص ... التعن اساسه وهو داير يزمرلها لحتى تركب .. ما علينا المهم
ركبت معو قام حكالها: في مجال لعولاقة......... حكت له: هلا اطلع على عبدون
وبعدين بنتفاهم ؟.
طلعوا وولع السيستم عالاخر على
اغنية فارس كرم الجديدة التنورة وحاااااالة . المهم وصلو عبدون روح يمين روح
شمال صفو عند باب فيلا جدتها
قبل ما تنزل حكى لها الشاب اللي بالسيارة: لحزة شوي خليكي بالسيارة بدي اعطيكي
هالغرض تعطيه لتاتا لميس حكت له انت من وين بتعرفها ؟؟؟ حكى لها : ما بعرفها بس
مش حلوة بحقها تجيبي لها حبتين دونتس انا واصل وورلد اف دونتس اجيبلها بكيت .
لولو: يا الله شو انك شهم يا .... لك صحيح شو اسمك؟
الشب الطاقع: مؤيد
لولو: حتى اسمك حلو ؟؟
الشب: بعرف
لولو: وجع ..المهم ضلت تستنى بالسيارة بالاخر يئست ورنت عليه عالموبايل( اه
نسيت اقلكم انو هم اخدوا ارقام بعض) ..... توووووووت
لولو: وينك يا مؤيد
مؤيد: اه حياتي معلش شفت صاحبتي ايام المدرسة وقاعدين منتزكر ايام التفولة
اعزريني ، انتي روحي عند تاتا لميس وانا بلحقك
لولو: بس ما تتاخر تك تك (لولو بتمشي) دق دق دق
ما في حدا مسكت ايد الباب وفتحته ، وين ساندرا طيب ليش ما فتحت
فاتت... تاتا تاتا تاتا وينك انا
لولو ...فاتت على غرفة تاتا لميس ، تاتا نايمة ، تاتا اصحي انا لولو ، اه تاتا
كيفك حبيبتي ؟؟
لولو: مالك تاتا ليش هيك وجهك منفخ وليش مغطيه على شعرك ... من ايمتا ...
تاتا لميس: لا حبيبتي بس لاني كنت عند الكوافير بصبغ شعري والله يقطعه خربلي
اياه ومستحية اورجيه لحدا
لولو: طيب ليش هيك خدودك خشنانين
تاتا لميس: هاي اللله يغص بالها الفيلبينية تاعت المساج اللي بـ شول عجبت على
وجهي
لولو: تاتا لميس وين؟؟؟ ولك انت مؤيد الزفت
مؤيد: اه انا مؤيد وساندرا وتاتا لميس ... الله يسهل عليهم جبتلهم تزاكر يحضروا
فيلم بسينما جالريا مش هون .... هلا هاتي الدونتس بلاش ما تلاقي توصيلة البيت
لولو: بالله عليك ، ولك انا الف سيارة بتتمنى اركبها
مؤيد: ازا طلعتي من هون يا حلوة
لولو: هلا برن على دادي (بابا) بخليه ييجي يشوف شغله
مؤيد: موبايلك معي
لولو: هئ هئ هئ (بتبكي بدلع) ولا فجاة: الباب بفتح ... هوب مين ؟؟؟ ولا هو رجب
الحارس تبع الفيلا
رجب: بت يا لولو بتعملي ايه عندك
لولو: اجيت والله جابك .. هادا الشاب كان بده ياكل الدونتس اللي جايبتها معي
لتاتا لميس
رجب مسك مؤيد من غرته اللي رافعها بسطل جل وكحشه برا البيت
ما في ثواني ولا تاتا لميس جاي
تاتا لميس : خير لولو حبيبتي ليش عم تبكي؟
لولو: هيك هيك القصة
تاتا لميس اعجبت بشهامة رجب وولعت الستيريو على اغنية الفنانة هيفاء وهبي ( رجب
حوش صاحبك عني) وصاروا يرقصوا ورجب مكسووووف اوي
حطوا هالدونتس واكلوا وبعدين راح رجب وقف للولو تكسي ووصلها عالبيت وما حكت
لماما ريتا شو صار عشان ما تمنعها من زيارة تاتا لميس مرة تانية
وتوتة توتة خلصت الحدوتة..............
الدروس المستفادة من القصة:
1. اسمع كلام ماما وما تسمع كلام بابا
2. ما تركب سيارة حدا اول مرة بتشوفه يعني تاني مرة اوكي اما اول مرة لا
3. زبط ((((عولاقاتك)))) مع الشغيلة
